फलटण पोलिसांचा ‘मोकाट’ बुलेटस्वारांना दणका; १० दिवसांत २०७ केसेस, दीड लाखांहून अधिक दंड वसूल!
फलटण (प्रतिनिधी): शहरात विनाकारण फिरणारे ट्रिपल सीट दुचाकीस्वार, विना नंबर प्लेटच्या गाड्या आणि कर्णकर्कश आवाज करणाऱ्या ‘मॉडिफाय सायलन्सर’ लावलेल्या बुलेटस्वारांवर फलटण शहर पोलिसांनी मोठी कारवाई केली आहे. अवघ्या १० दिवसांच्या विशेष मोहिमेत पोलिसांनी तब्बल २०७ केसेस दाखल करत दीड लाखांहून अधिक रुपयांचा दंड ठोठावला आहे.
नेमकी कारवाई काय? दिनांक १ मार्च ते १० मार्च २०२६ या कालावधीत फलटण शहर पोलीस ठाण्याच्या वतीने वाहतूक नियमांचे उल्लंघन करणाऱ्यांविरुद्ध विशेष मोहीम हाती घेण्यात आली होती. यामध्ये प्रामुख्याने खालील बाबींवर लक्ष केंद्रित करण्यात आले: ट्रिपल सीट दुचाकी: नियमांचे उल्लंघन करून फिरणाऱ्या दुचाकीस्वारांवर कारवाई.
विना नंबर प्लेट: नंबर प्लेट नसलेल्या संशयास्पद वाहनांची धरपकड.
बुलेट सायलन्सर: सायलेन्सरमध्ये बदल करून शहरात मोठमोठ्याने आवाज करत फिरणाऱ्या बुलेटस्वारांवर पोलिसांनी विशेष नजर ठेवली होती.
आकडेवारी काय सांगते?
पोलिसांनी दिलेल्या माहितीनुसार, या मोहिमेदरम्यान:
एकूण केसेस: २०७
एकूण दंड: १,४९,१०० रुपये (एक लाख ४९ हजार १०० रुपये)
रोख वसूल दंड: १५,२०० रुपये
जप्त सायलन्सर: कारवाई दरम्यान १४ मॉडिफाय सायलन्सर जप्त करण्यात आले आहेत.
”शहरातील शांतता भंग करणाऱ्या आणि वाहतूक नियमांचे उल्लंघन करणाऱ्या कोणाचीही गय केली जाणार नाही. ही कारवाई यापुढेही सुरूच राहील.” – पोलीस प्रशासन, फलटण.
यांच्या मार्गदर्शनाखाली झाली कारवाई:
ही धडक कारवाई सातारा पोलीस अधीक्षक श्री. तुषार दोशी, अप्पर पोलीस अधीक्षक श्रीमती डॉ. वैशाली कडुकर, आणि फलटणचे उपविभागीय पोलीस अधिकारी श्री. विशाल कृष्णा खांबे यांच्या मार्गदर्शनाखाली पार पडली.
या मोहिमेत फलटण शहर पोलीस ठाण्याचे पोलीस निरीक्षक श्री. अरविंद काळे, वाहतूक विभागाचे सहा. पोलीस उपनिरीक्षक श्री. सुरेश शिंदे, तसेच पोलीस कर्मचारी ऋषिकेश खरात, पांडुरंग धायगुडे, सुरज परिहार आणि संभाजी जगताप यांनी महत्त्वाची भूमिका बजावली.
पोलिसांच्या या ‘सिट्टी’मुळे फलटणमधील हुल्लडबाजी करणाऱ्या तरुणांचे धाबे दणाणले असून, नागरिकांनी या कारवाईचे स्वागत केले आहे.
